Heim frá London

Jæja þá eru tvennir af þessum þrennum skóm komnir í hús. Hlaupaskórnir voru keyptir á 14.000 en kosta hér 35.000. Geggjaðir skór sem ég er búin að prófa. Við GM fórum að hlaupa áðan, báðar á nýjum skóm.
Rauðu skórnir voru líka keyptir, þeir voru á útsölu á Oxford Street og kostuðu 49 pund. Þeir eru æðislegir bæði flottir og þægilegir.
Svörtu skóna langaði mig líka í en gat ekki keypt þá líka.

Skór

Mig langar í skó. 

Mig langar í þrenna skó. Ég fór í Smáralind í dag og sá nokkur pör sem mig langar mikið í. En keypti ekki neitt því ég ætla að athuga hvort London bjóði betra verð. 

Þetta eru fyrstu skórnir sem mig langar í. Hlaupaskór sem maður svífur í, ég hef aldrei stigið í skó sem eru jafn mótaðir fyrir minn fót og þessir. Þeir eru fullkomnir, allt nema verðið sem er ansi mikið. En planið er sem sagt að fara að hlaupa og þá vil ég ekkert nema góða skó.

Þetta eru skór nr tvö sem mig langar í. Þetta eru leðurstrigaskór frá Ecco. Mér finnst þeir ógeðslega flottir en ég mátaði þá áðan og 39 er eiginlega of lítið og 40 er aðeins of stórt. Þannig að ég ætla aðeins að melta það.

Þetta eru svo þriðju skórnir sem mig langar í. Þeir eru líka frá Ecco. Ég sá þá bara á netinu en ekki í búðinni í Smáralind. Kannski eru þeir til í London hver veit.

En eftir þessa bæjarferð var það bara JÁ sem fékk skó.

komin á fertugsaldurinn

já við erum búin að ákveða það hér á bæ að það sé algjör vitleysa að vera að gera fólk eldra en það er. Ég er nú bara rétt komin á fertugsaldurinn eins og útlendingarnir segja. Auðvitað er rétt að telja svona, við erum alltaf að flýta okkur svo mikið að við náum aldrei að njóta stundarinnar og staðsins sem við erum á núna, já núna. Við segjum að klukkan sé farin að ganga sex þegar hún er fimm mínútur yfir fimm, hvaða vitleysa er þetta eiginlega. Við mæðgur mótmælum þessu og segjum sko ekki að hún GM sé komin á tvítugsaldurinn, enda kornung barnið.

Annars átti ég bara ljúfan dag, fór í vinnuna mína, kenndi yndislegum þriðjubekkingum að sauma út, snúa bönd og prjóna. Hvað er þetta annars með grunnskólabörn, það kann enginn að binda hnút..... ég hélt að þetta væri bara svona eins og að kunna að skeina sig, bursta tennurnar eða kasta bolta, eitthvað sem allir á grunnskólaaldri eiga að kunna. Nei nei börn alveg upp í 7. bekk kunna ekki að binda hnút, og þá er ég ekki að tala um fjórfaldan skátahnút heldur bara einfaldan hnút.....

Jú sem sagt, þegar ég var búin í vinnunni, fór ég á rölt niður í bæ. Fór fyrst í Pfaff og lét mig dreyma um overlock vél sem kostar 140.000 bara, fékk bækling og allt! Fór svo í Fiðrildið og keypti nokkra notaða boli á L. Stórkostleg búð og falleg í alla staði, afgreiðslustelpan svo næs og almennileg, allt svo fallegt þar, ég fer þangað aftur, pottþétt. Síðan var arkað niður á Laugaveg, þar inn í nokkrar uppáhaldsbúðir eins og Storkinn, Kron, Heilsuhúsið, Kisuna, Nálina og svo uppgötvaði ég Andersen og Lauth, held ég að hún heiti, við hliðina á Kisunni, mjög flott og mjög dýr. En það er víst útsölumarkaður ofarlega á Laugaveginum sem ég kíki í síðar.

Tókst samt ekki að eyða neinu, nema í eitt brauð í Heilsuhúsinu, það er nú alveg fjárfesting!!
Fór heim, sótti L, var heima í rólegheitum. Þegar allir voru komnir heim af æfingum fórum við og náðum í G í vinnuna og borðuðum á Eldsmiðjunni. Nokkuð góðar pizzur, þó ekki þær bestu í bænum.

Fékk rósir frá G.

Fórum heim, Guðmundur bróðir og hans fam komu, gáfu mér afmælisgjöf og kossa. Börnin í háttinn, rólegheit í sófanum. Tölvan.

Sem sagt hinn indælasti dagur, venjulegur en samt góður. Gott að vera komin á fertugsaldurinn!

dottin í tölvuna

Já ég hef nú ekkert skrifað inn á þetta blogg svo vikum skiptir. Það mætti halda að ég væri ekki að gera neitt af viti en svo er nú víst ekki. Ég hef alveg nóg á minni könnu og meira að segja of mikið fyrir minn smekk.

Það er vinnan, sem mér finnst ég alltaf geta sinnt betur, verið betur undirbúin, tekið betur til í stofunni, fundið fleiri verkefni sem gott væri að prófa og svo framvegis.

Það eru blessuð börnin, loksins (sjöníuþrettán) er L orðin frísk. Hún blómstrar alveg, fór út í dag með systkinum sínum og sagði þegar hún kom inn: mamma, gaman úti! Ég skrapp inn á leikskólann í dag og fékk að vita að hún má byrja 25. ágúst í aðlögun á Dvergasteini. Mér líst auðvitað vel á það en þarf að brúa 10 daga bil, því ég geri ráð fyrir að byrja að vinna um 15. Sem betur fer eigum við 2 stk ömmur sem vilja gjarnan passa þannig að þetta reddast. J hugsar ekki um annað en fótbolta, hvernig er hægt að hugsa svona mikið um áhugamálið sitt, það kemst bara ekkert annað að (ég skil ekki......) G er svo dugleg að passa L og samviskusöm. Hún teiknar og teiknar þegar hún á lausa stund, allt ótrúlega flott hjá henni.

Það er hin vinnan, sem ég er alltaf með yfir hausnum á mér. Nú veit ég hvernig ég væri ef ég væri í námi með vinnu, með stanslaust samviskubit. En þetta gengur nú ágætlega hjá mér, það er samt kominn miður apríl og allt á að vera tilbúið í maí, úpps....

Svo er það London ferðin sem nálgast óðfluga. Nú er ég orðin nokkuð spennt, G er alltaf að spyrja mig hvort ég sé ekki orðin spennt, hann er löngu búinn að plana alla dagana, allt gert fyrir mig að sjálfsögðu þessi elska. Garnbúðir, litlar sætar götur, grænmetisveitingastaðir, lífrænar búðir, markaðir......... kannski ég komi með honum í svo sem eina plötubúð, bara til að vera næs.

Svo er það áhugamálið, prjónið er alltaf það skemmtilegasta sem ég geri. Finnst ég alltaf þurfa að grípa í það annað slagið eða réttara sagt á milli húsverka. Finnst mjög gott að taka nokkrar umferðir áður en ég brýt saman þvottinn. Þegar ég er búin með hælinn set ég í vél. Þarf ekki L örugglega eina vettlinga í viðbót?? Ég held að þetta sé fíkn, annars hef ég líka aðra fíkn og það er súkkulaði. En ég er búin að segja við sjálfa mig, alltaf þegar mig langar í súkkulaði þá prjóna ég frekar eina umferð. Ég er að vona að þetta dugi...... hmmmmm.....

gott í bili

Endurunnið þema

Á þessari síðu má finna endurunnar boxer buxur búnar til úr gömulum bolum, algjör snilld. Ég væri til í að prófa þetta, veit ekki hvort JÁ væri til í að vera í heimasaumuðum nærbuxum en mig langar samt að prófa.

http://burkeshires.blogspot.com/2010/01/toddlerboys-boxer-briefs.html

Endurunninn kjóll

Hér er kjóllinn sem ég gerði á Lilju Katrínu úr þessum bol sem ég átti. Útkoman er frábær að mínu mati, hann passar fullkomlega og endurvinnslufílingurinn er fullkominn.

Kvöldmatur

Guðrún María eldaði kvöldmat í gærkvöldi. Innbakaðar pulsur í brauði og grænmeti með. Þetta var rosalega gott og frábært að þurfa ekki að elda. Hún fann þessa uppskrift í uppskriftabók barnanna sem við eigum og er margt mjög girnilegt í henni.

Namm namm....

Búin að uppgötva poppið!!

Henni Lilju Katrínu fannst poppið æði! Pabbi hennar gaf henni að smakka um daginn og þá er ekki aftur snúið. Hún er líka búin að fatta hvað saltstangir eru góðar og þegar pabbi hennar stalst í saltstangir í hádegismatnum þá vildi hún ekki meira grænmeti, nei bara saltstangir.

Hún er að verða 1 árs eftir viku litla barnið mitt sem fæddist í gær! Hún stendur upp við allt, gengur með og segir tíu þegar maður spyr hana hvað hún sé með margar tásur.

Hjólaferð

Lilja Katrín að prófa stólinn í fyrsta skipti og með nýja hjálminn sinn sem hún reyndi stanslaust að taka af sér. Við hjóluðum meðfram ströndinni og týndum ber líka. Guðrún María og Gunnar voru með í för.


Eins og sést þá fannst henni mjög gaman í hjólaferðinni!!

26 kílómetrar í dag

Ég hjólaði með JÁ og GM í dag úr Grafarvogi í Nauthólsvík og þaðan í grasagarðinn í Laugardal og svo aftur heim. Þetta voru samtals 26 km og voru krakkarnir algjörar hetjur. Þau kvörtuðu aldrei og vildu sko ekki taka strætó úr Laugardalnum eins og ég bauð þeim, neihei þau vildu sko hjóla heim.
Þetta var frábært, gott veður og skemmtilegur félagsskapur.

Gunnar og LK komu á bílnum og voru með okkur fyrst í Nauthólsvík, þar sem var of mikið rok og of kalt fannst okkur. Síðan hjóluðum við í Laugardalinn og hittum þau þar. Þar fundum við frábært skjól og settumst niður með teppi og nesti. LK lék á alls oddi í grasinu og fannst mjög gaman.

Svo var auðvitað nauðsynlegt að teygja á eftir allar hjólreiðarnar, þarna er GM að sýna mömmu sinni hvernig best er að teygja á.

Frábær dagur!!

Fleiri myndir

LK glöð að klappa, við vinnum hörðum höndum að kenna henni að sýna hvað hún er stór en hún skilur það ekki ennþá. En hún klappar ef maður segir L klappa!

JÁ tannlaus! Loksins fór framtönnin sem var búin að vera laus alveg ótrúlega lengi. Nokkrum dögum áður fór tönnin í neðri góm.

Á sólríkum degi á svölunum!!

Krakkarnir

Var að prófa nýju linsuna sem Gunnar keypti í London. 50 mm föst linsa og ég er bara nokkuð ánægð með hana. Þarf samt að æfa mig betur, var eiginlega bara með stillt á auto, sem er víst bannað!!

Fókusrölt

Fór á Fókusrölt með Jóhönnu systur í kvöld og upplifði Reykjavík og Vesturbæinn á nýjan hátt. Ekki vissi ég að það væri svona flott í Vesturbænum. Þetta tré varð á vegi okkar í einum bakgarðinum og húsið á bak við er líka flott.
Þetta var ótrúlega skemmtilegt kvöld og nú langar mig bara að fara aftur, það er spurning um að skrá sig í þetta Fókus félag. Ég þarf nú kannski að æfa mig pínu meira, áður en ég fer í félagið, það virtust allir vera svo klárir þarna.
Annars eru allar græjur til á þessu heimili, þrífótur og linsur það er bara spurningin um að fara að æfa sig og nota græjurnar. Þetta var bara gaman í kvöld. Takk Jóhanna fyrir að bjóða mér með.

Göngutúr í Grafarvogi

Stundum man ég eftir að taka myndavélina með mér og það eru svo ótrúlega mörg myndefni á leiðinni þegar ég er úti að labba með LK. Samt er ég nú bara hérna í Víkurhverfinu og Engjahverfinu.

sól sól

Já loksins skín hún sólin, þó að það sé 9 stiga frost úti þá virðist vera hlýrra á svölunum í sólinni. Eða ég vona það alla vegana. Mér finnst alltaf hálf skrýtið að setja börn út í vagn í frosti en hún sefur bara svo miklu betur úti. Inni sefur hún í ca 1/2 tíma í einu svona 3-4 sinnum yfir daginn en ef hún er sett út í vagninn þá sefur hún um 2 tíma í einu. Hún er búin að vera svo óróleg og frekar vælin núna undanfarna daga og nætur. Ég er að reyna að venja hana af því að drekka á tveggja tíma fresti á nóttunni og gekk það ágætlega í nótt. Hún vaknaði um miðnættið og svo aftur um 3 og svo aftur um 6. Það er skárra en það var.

Ég fór á námskeið í gærkvöldi með Dóru í Heilsuhúsinu hjá henni Ebbu Guðnýju um mat fyrir börn. Þetta var mjög skemmtileg kvöldstund og fengum við margt mjög gott að smakka. Ég keypti bókina hennar og er rétt að byrja að fletta henni. Hún lofar góðu.

Hætt á fésinu

Já ég er hætt í facebook, fékk nóg af persónulegum upplýsingum frá hinum og þessum og langaði bara ekki að vera með í þessu lengur. Gunnar horfði á mig, ertu í alvörunni hætt. já ég er hætt!!
Þetta er bara tímaþjófur hjá mér og orðinn ávani á hverjum degi að þurfa að fara inn og hvað, já og hvað: fylgjast með þvi hvað fólk er að gera alla daga?? Nei nú er komið nóg, frekar eyði ég tímanum með Lilju minni eða hinum börnunum eða bara með sjálfri mér í einhverju skapandi.

Fyrsta heimasaumaða taubleian

Flottust á bleiunni

Þarna er hún Lilja Katrín á bleiunni og teppinu sem Þura saumaði og gaf henni í jólagjöf. Hún er nú bara flott svona bleik og stelpuleg!!

Svo falleg

Hún er svo dömuleg litla Lilja mín. Hún er orðin svo dugleg, er farin að grípa í dót og leika sér. Farin að hreyfa sig aðeins á gólfinu, var búin að færa sig heilmikið til á teppinu í dag, komin að leikslánni og farin að naga hana. Það er svo gaman að fylgjast með framförunum hjá henni.

Bók fyrir mig

Mig langar í þessa bók, þetta er akkúrat það sem ég er að spá í núna.